Дорнод аймгийн ”Баян уул” сум иймэрхүү байдалтай байна
Зүүн гурван аймгийг хамарсан түймэр олон га газрыг сүйтгэж гамшгийн хэмжээнд хүрээд байгаа бөгөөд одоог хүртэл галыг зогсоож чадахгүй байна. Түмэнцогт сумд гарсан түймэр цурманд орсон ч цаг агаар, салхины хурдаас болж дахин дэгдэж, сумын ойр орчмыг хар үнсэн тал болтол хуйхалсан гэж Онцгой байдлын ерөнхий газраас мэдээлсэн. Түмэрт өртсөн нутгийн иргэд их хэмжээний хохирол амсаад байгаа бөгөөд олон айл шатаж, хэдэн мянган мал галд өртөж шатаж үгүй болсон. Хүнд цаг үеийг туулж байгаа нутгийн иргэдэд тусламжийн гараа сунгахаар сайн дурынхан мөнгө хандивлаж буй.
Тэгвэл “Хамаг Монгол” төслийн МУГЖ С.Жавхлан тэргүүтэй хэсэг хүмүүс түймэртэй тэмцэж байгаа нутгийн иргэдэд туслахаар болсон.
Тэдний мэдээлж байгаагаар Баян-Уул сумын 50 гаруй хувь шатаж өтгөн хар утаанаас өөр зүйлгүй болсон байна гэв. Өдрийн цагаар тус аймгийн үзэгдэх орчин харанхуй, шатсан өвс ургамал, модны үртэс салхиар туугдан энд тэндгүй хөглөрч, амьсгалахын аргагүй орчинд нутгийн иргэд амьдарч байна хэмээлээ.
Мөн түүний эхнэр дуучин Эрдэнэчимэг өөрийн цахим хуудсаараа дамжуулан тусламж хүслээ. Тэрээр “Дорнод аймгийн Баян уул суманд миний хань Жавхлан тэргүүтэй Хамаг монгол төслийн багийнхан чадлынхаа хэрээр хандив өргөж, гал унтраалцаж явна. Эх орон минь шатаж байна. Илүү их хүн хүч хэрэгтэй байгаа бололтой хэмээн бичжээ.
Дашрамд дурьдахад тус суманд Монгол Улсын Ерөнхийлөгч Ц.Элбэгдорж ажиллаж орон нутгийн иргэд, түймрийн голомт дээр гал унтраахаар ажиллаж буй хүмүүс, цэрэг, дайчидтай уулзлаа.
