Сонгинохайрхан дүүрэг “Хоггүй орчин-Эрүүл амьдрал” аян зарлалаа
Төсөв мөнгөний хүндрэлтэй гээд хогондоо дарагдаад суух биш байгаа бололцоогоо ашиглаж, сүүлийн 3-4 жилд үүссэн үүсмэл хогийн цэгийг арилгаж иргэдийн аюулгүй орчинд амьдрах эрхийг хангах, хог хаяхгүй байх дадал төлөвшүүлэх, үүсмэл болон хур хог хаягдлын цэгийг бүрэн устгах, дахин хог хаягдлын цэг үүсгэхгүй байх үйл ажиллагааг идэвхжүүлэх, хог хаягдлыг бууруулах талаар шинэ арга барил бүхий санал, санаачлагыг дэмжих зорилгоор тус дүүргийн Засаг дарга Ж.Сандагсүрэн 2017 оны 03 дугаар сарын 30-ны өдрийн А/145 тоот захирамж гаргажээ. "Хоггүй орчин-Эрүүл амьдрал” аянд тус дүүргийн 32 хорооноос гадна нийтийн эзэмшлийн гудамж, зам талбайн цэвэрлэгээ, үйлчилгээ, хог хаягдал цуглуулалт, тээвэрлэлтийн байгууллагууд оролцох юм. Хогноосоо салахад иргэдийн оролцоо чухал үүрэгтэй. Иргэн бүр хоггүй орчныг бий болгоход гар бие оролцон, шинэ санал санаачлага гарган ажиллахыг уриалж байгаа ажээ. "Хоггүй орчин-Эрүүл амьдрал” болзолт уралдааныг 2017 оны 04 дүгээр сарын 01-нээс 06 дугаар сарын 01-ний өдөр хүртэл зохион байгуулах гэнэ. Мөн Нарангийн энгэрийн хогийн цэгт хог боловсруулах үйлдвэр байгуулах талаар Япон улстай хамтран ажиллах төсөл хэрэгжүүлэх болсон байна. Нүдэнд ил харагдах хог хаягдлаас гадна хөрсний бохирдол, орчны бохирдол иргэдийн эрүүл мэндэд сөргөөр нөлөөлдөг. Тиймээс Сонгинохайрханчууд хур хогноосоо салах аяныг ийнхүү эхлүүлжээ.
