Оюутан цэргүүд Чингисийн талбайд тангараг өргөнө
“Оюутан цэрэг” хөтөлбөрт энэ жил 66 их, дээд сургуулийн 1000 гаруй оюутан хамрагдаж, долоон их, дээд сургууль дээр зургаан бүлгээр онолын мэргэжил сургалт явуулсан юм. Цэргийн мэргэжлийн бэлтгэл сургалт өнгөрсөн зургаадугаар сарын 15-наас эхэлсэн бол энэ сарын 12-нд Чингисийн талбайд тангараг өргөснөөр өндөрлөх гэнэ.
"Оюутан цэрэг"-үүдийн тангараг өргөх ёслолд Монгол Улсын Ерөнхийлөгч Ц.Элбэгдорж оролцох юм байна.
“Оюутан-цэрэг хөтөлбөр”-ийг хэрэгжүүлснээр олон давуу талууд бий болж буйг албаныхан онцолж буй. Тухайлбал, Зэвсэгт хүчний дайчилгааны бэлтгэл үүрэгтний нөөц нэмэгдэж, улс орноо батлан хамгаалах иргэдийн бэлтгэл сайжирч, их дээд төгсөгчид Төрийн албанд орж ажиллах нөхцөл бүрдэх бөгөөд оюутан залуус их дээд сургуульд суралцах хугацаандаа цэргийн ерөнхий бэлтгэл, цэргийн тусгай бэлтгэл сургалтанд хамрагдах замаар цэргийн жинхэнэ албыг биеэр хаах боломж бүрдэж байгаа юм.
“Оюутан цэрэг” хөтөлбөрт 2014 онд 418 оюутан хамруулан бэлтгэж, цэргийн тангараг өргүүлэн, буудагч-тасгийн дарга баг мэргэжлээр бэлтгэсэн байдаг. Харин энэ жилийн оюутан цэргүүд ч буудагч-тасгийн дарга баг мэргэжлээр бэлтгэгджээ. Дашрамд дуулгахад, Батлан хамгаалахын сайд Ц.Цолмон, Боловсрол, соёл, шинжлэх ухааны сайд Л.Гантөмөр нар ирэх баасан гарагт Төв аймгийн Алтанбулаг сум дахь Сургалтын нэгдсэн төвд цэргийн мэргэжлийн бэлтгэлд гарсан "Оюутан цэрэг"-үүдээ эргэхээр болжээ.
