Хувийн цэцэрлэгт 3000 хүүхдийг үнэ төлбөргүй хамруулна
Боловсрол, соёл, шинжлэх ухааны сайд Л.Гантөмөр, “Монголын сургуулийн өмнөх боловсролын хувийн хэвшлийн байгууллагуудын холбоо” ТББ-ын тэргүүн Т.Мөнх-Алдар нар өнөөдөр 3000 хүүхдийг хувийн цэцэрлэгт үнэгүй хамруулах “Сайн үйлсийн аян”-ыг эхлүүлж, санамж бичигт дөнгөж сая гарын үсэг зурлаа.
Аяны хүрээнд нийслэлд үйл ажиллагаа явуулж буй төрийн бус өмчийн цэцэрлэгүүд 2015-2016 оны хичээлийн жилд нийслэлийн төрийн өмчит ерөнхий боловсролын сургуулийн багш, ажилчдын хүүхдүүдийг үнэ төлбөргүй сурган хөгжүүлэх юм байна.
БСШУ-ны сайд Л.Гантөмөр “нэг цэцэрлэгт 100 хүүхэд сурна гэж бодоход 3000 хүүхдэд 30 цэцэрлэг хэрэгтэй. Нэг цэцэрлэгийн барилгыг нэг тэрбум төгрөгөөр барина гэж тооцвол 30 тэрбум төгрөг болно. Тэгэхээр манай хувийн хэвшлийн цэцэрлэгүүд 3000 хүүхдийг үнэ төлбөргүй цэцэрлэгтээ хамруулсанаар энэ салбарт 30 тэрбум төгрөгийн хөрөнгө оруулалт хийж байна гэсэн үг.
Улс орны эдийн засаг хүнд байгаа энэ үед ачааны хүндийг үүрэлцэж байгаа хувийн хэвшлийнхэндээ маш их талархаж байна. Энэ 3000 хүүхэд дотор манай ерөнхий боловсролын сургуулийн багш нарын хүүхдүүд дийлэнх хувийг эзэлнэ” гэлээ.
