Зөөлөн гэдэс дур булаам гэдэгтэй маргахгүй нь. Гэхдээ зөөлнөөс илүү хатуу, чанга, товгор хэвлийтэй болохыг хүсч байгаа бүсгүйчүүд байвал нааш анхаарлаа хандуулаарай. Дараах 6 дасгал чиний хэвлийг хавтгай болгоход хамгийн үр дүнтэй. Гэдсээ нэг чангаруулчихсан байхад, хүүхэд төрүүлсний дараа унжина гэж санаа зоволтгүй юм шүү.

Гэхдээ эдгээр дасгал нь жин хасах, калори шатаахад тийм ч тустай биш гэдгийг сана. Хэрэв илүүдэл жингээсээ салах гэж байгаа бол бие халаалт, аэробикоор хичээллэнгээ гэдэсний дасгал хийх хэрэгтэй. Дан гэдэсний таталт хийснээр турна гэж эндүүрч болохгүй.

1. Дугуй

Энэ дасгал нь бүсэлхий болон гэдэсний шулуун булчинд хамгийн сайн нөлөөтэй. Шалан дээр, эсвэл гудсан дээр дээшээ харж хэвтээд, гараа толгойныхоо ард авна. Гэхдээ чанга барьж болохгүй, хуруугаараа дөнгөж дэмжих төдий түш. Өвдгөө нугалж цээж лүүгээ ойртуулаад, мөрөөрөө үл ялиг өндийж өг. Зүүн тал руугаа хазайж, баруун тохойгоо зүүн өвдөг лүүгээ дөхүүлээд, нөгөө хөлөө жийнэ. Энэ үйлдлийг баруун, зүүн талаараа ээлжилж хийнэ. Нэг хөлөндөө 12-16 удаа хийгээрэй.

2. Бөмбөгтэй таталт

Шалан дээр гэдэсний таталт хийхэд хөлний булчин ч бас оролцоод байдаг. Харин энэ дасгалыг хийвэл зөвхөн гэдэсний булчин ажиллахаараа давуу талтай. Том дасгалын бөмбгөн дээр нуруугаараа хэвтээд, гараа цээжнийхээ урд зөрүүлэх юм уу толгойныхоо ард авна. Цээжин биеэ хөндийрүүлэхдээ бөмбгөө хөдөлгөхгүй байхад анхаараарай. 12-16 удаа хийнэ.

3. Хөлөө нугалж гэдэсний таталт хийх

Бөмбөг байхгүй бол энэ дасгалыг хийгээрэй. Хөлөө өргөснөөрөө гэдсэнд бүх ачааллыг өгнө. Шалан дээр хэвтээд, хөлөө өргөж өвдгөө бага зэрэг нугална. Гараараа толгойгоо түшээд, цээжээ дээш өргөж хөлөндөө хүргэхийг оролд.

4. Хөл таталт

Хэвтэж байгаад хөлөө дээш татах нь гэдсийг хавтгай, булчинлаг болгох 5 дах үр дүнтэй дасгал юм. Энэ дасгал нь гэдэсний доод хэсгийг чангаруулна. Гараа ардаа авч хэвтэж байгаад, өвдгөө 90 градус нугалартал нь цээж рүүгээ татна. Хөлөө зөрүүлж байгаад татаарай.

5. Зуут

Гудсан дээр хэвтээд, хөлөө нугална. Ул чинь шаланд хүрч байх ёстой. Гараа газраас 10-аад см-ийн зайтай тэнийлгэж өргөөд, мөр, толгой, нугалсан хөлөө үүнтэйгээ зэрэг өргөнө. Өргөсөн чигтээ гараа дээш доош 100 удаа хөдөлгөнө. Энэ хооронд 10 удаа амьсгал авч гаргана. Завсардуулж болохгүй.

6. Ахлагчийн суудал.

Сандлан дээр суугаад, түшлэгнийх нь хоёр талаас сайтар барина. Амьсгаагаа аваад, гаргахдаа аажмаар өвдгөө цээжнийхээ өмнө болтол өргөнө. Шаардлагатай бол сандлаа бага зэрэг хойш налж болно. 3 секунд бариад эхний байрлалдаа орно. 12 удаа хийгээрэй.