Б.Мөнх-Оргил: Чи минь хайр татам, эгэл дөлгөөхөн
Чиний минь нүд бусдаас үзэсгэлэнтэй
Миний л үзэхүйд
Чиний минь хоолой бусдаас эгшиглэнтэй
Миний л чагнахуйд
Чи минь хайр татам, эгэл дөлгөөхөн
Эс бүхнээрээ надруу тэмүүлэх эрх ертөнц
Чиний минь арьс бусдаас булбайрай
Миний л хүрэлцэхүйд
Чиний минь үнэр бусдаас анхилам
Миний л үнэртэхүйд
Чи минь хүсэл өдөөм, эмнэг халуухан
Дусал бүрээрээ надад уусах дулаахан ертөнц
Чиний минь уруул бусдаас чихэрлэг
Миний л амтлахуйд
Чиний минь ирээдүй надаас холдохгүй
Миний л зөгнөхүйд
Чи минь бодол цуцам, эмзэг мэдрэмтгий
Гуниг бүхнээрээ надаас уяатай чимээгүй ертөнц
Чиний минь инээмсгэлэл бусдаас ялдам
Ялдамаас ч ялдам, миний л дэргэд
Чиний минь яриа бусдаас ухаалаг
Ухаалагаас ч ухаалаг, миний л тэвэрт
Чиний минь оршихуй бусдаас ялгуун
Ялгуунаас ч ялгуун, миний л мэдэрхүйд
Чи минь гэрэл цацрам, урам өгөмтгий
Мишээл бүрээрээ сэтгэл ургуулах миний л ертөнц
Б.МӨНХ-ОРГИЛ
2017.05.14-нд
