Элтон Жон хууртагджээ
Английн дуучин эдүгээ 68 настай Элтон Жон өнгөрсөн долоо хоногт өгсөн ярилцлагадаа ОХУ-ын бэлгийн цөөнхийнхний эрхийг хамгаалах асуудлаар тус улсын Ерөнхийлөгч В.Путинтай ярилцахыг хүсч байгаагаа дурссан.
Улмаар энэ долоо хоногт өөрийн инстаграмм хуудастаа В.Путин Ерөнхийлөгчийн зургийг нийтэлж, “Өнөөдөр надтай утсаар ярьсанд баярлалаа” хэмээн бичиж, талархсан сэтгэлээ илэрхийлсэн юм. Гэвч ОХУ-ын Ерөнхийлөгчийн ордоны хэвлэлийн төлөөлөгч Дмитрий Песков үүнийг эрс үгүйсгэж, “тэднийг утсаар яриагүй” гэдгийг баталсан.
Тэгвэл таамаг дагуулсан энэ үйл явдлын жинхэнэ учиг тайлагдаж, хэргийн эзэн өөрөө өөрийгөө илчлээд байна. Учир юу гэвээс Оросын инээдмийн жүжигчин Владимир Краснов В.Путины өмнөөс Элтон Жонтой утсаар ярьсан гэдгээ илчлэв. Тэрбээр утсаар ярихдаа төрөлх орос хэлээрээ ярьж, найз нь Дмитрий Песковын дүрд хувиран англи хэл рүү орчуулж, хэл авалцсан гэнэ. Владимир Краснов өөрийн дэггүйтлийнхээ талаар “Элтон Жон үнэхээр хөгжилтэй хүн юм билээ. Ёстой гайхалтай өдөр байсан.
Би утасныхаа дугаарыг нууцалж байгаад ярьсан” гэжээ. Харин тэдний хооронд болсон ярианы агуулгыг ток шоуны үеэр олонд ил болгоно гэсэн зарыг тараасан байна. Краснов өмнө нь Беларусын Ерөнхийлөгч Александр Лукашенко зэрэг олон хүмүүсийг шоглож байсан удаатай юм.
